Табрикоти раиси суди ҳарбии гарнизони Душанбе ба муносибати Рӯзи ҷавонон

Шуморо ба муносибати Рӯзи ҷавонони Тоҷикистон, ки ҳар сол онро рӯзи 23-юми май дар фазои сулҳу дӯстӣ ва муҳаббат ба Ватан ҷашн мегирем  самимона табрик менамоям.
Аз ин хотир, моро зарур аст, ки бурду бохтамонро дар ин давра таҳлил карда, ба оянда бо нерӯи бештар баҳри созандагӣ қадам ниҳем.
Воқеан, ҷавонони ҳамсоли истиқлол имрӯз мактабҳои олиро хатм карда, барои адои хизмати ҳарбӣ ва баъди адои он дар соҳаҳои гуногун ба фаъолият пардохтаанд. Онҳо, ки диду нигоҳи муосир доранд, ҳар чӣ зудтар рушд карда, барои ташаккул ёфтани давлат ва эъмори ҷомеаи демократӣ саҳм хоҳанд гузошт.
Қисмати асосии аҳолии кишварро ҷавонон ташкил медиҳанд. Таваҷҷуҳ ба ин қишри ҷомеа аз рӯзҳои аввали соҳибистиқлолӣ равона гардида буд. Зеро ҷавонон бо қувва ва нерӯи ҷисмонию маънавии худ барои устувории ҷомеа нақши бағоят калон доранд.
Ҷавонони саодатманди кишвар имрӯз дар ҳамаи соҳаҳои ҳаёти хоҷагии халқ бо дастовардҳои назаррас ва муваффақиятҳои калон ширкати фаъолона варзида, барои баланд бардоштани ному мақоми кишвари соҳибистиқлоламон собитона қадам мезананд. Ҳамаи инро ба инобат гирифта, Ҳукумати мамлакат бо роҳбарии Асосгузори сулҳу ваҳдати миллӣ, Пешвои миллат, Президенти маҳбубамон, муҳтарам Эмомалӣ Раҳмон тамоми шароитро барои насли ояндасозу ватанпарвар, ҷиҳати зиндагиву фаъолияти шоиста муҳайё сохтаанд. Таъсиси стипендияи «Президентӣ» барои хонандагони муассисаҳои таҳсилоти миёна, квотаи «Президентӣ» барои таҳсили духтарону ҷавонони ноҳияҳои дурдаст дар муассисаҳои таҳсилоти олӣ, таҳсили ҷавонон дар мактабҳои олии хориҷи кишвар аз ҳисоби Фонди Президенти ҷумҳурӣ, ҷоизаи Президенти кишвар ба ғолибону ҷоизадорони мусобиқаҳои байналмилалии варзишӣ ва ба ин монанд номгӯи таваҷҷуҳи Пешвои миллат, муҳтарам Эмомалӣ Раҳмон ба қишри фаъоли ҷомеаро метавон номбар кард.  Мо аз ҷавонони варзишгари худ барои ба даст овардани медалҳои олимпӣ умед дорем.
Бори дигар ҳамаи шуморо ба муносибати Рӯзи ҷавонон,  табрик ва таҳният намуда, дар симои Шумо ба кулли мардуми шарифи Тоҷикистон сарбаландӣ, тансиҳатӣ, хонаи обод ва сулҳу оромии ҳамешаги кишвари азизамонро таманно дорам.
Ҳамеша муваффақ бошед!

                      Раиси суди ҳарбии гарнизони                                                                                                                                            Душанбе полковники адлия                                  Шарифзода Рудоба